Heimsókn matvælaráðherra á Keldur

Svandís Svavarsdóttir, matvælaráðherra heimsótti í gær tilraunastöð Háskóla Íslands í meinafræði að Keldum og fékk þar kynningu á starfseminni.
Heilbrigði dýra skiptir gríðarlega miklu máli í allri matvælaframleiðslu. Tilraunastöðin að Keldum rannsakar sjúkdóma í flestum spendýrategundum á Íslandi og allmörgum fugla- og fisktegundum. Tilgangurinn er að efla skilning á eðli sjúkdóma og skapa nýja þekkingu í samstarfi við Matvælastofnun.
„Auk þess að kynnast vel starfsemi Keldna ræddum við samstarf og framtíðarhorfur. Á Keldum er unnið mikilvægt rannsóknastarf í þágu vísinda og atvinnulífs. Þar býr mikil reynsla og þekking sem þarf að nýtast sem best í þágu matvælaframleiðslu á Íslandi“ segir matvælaráðherra.