Heimsókn forseta Íslands og félagsmálaráðherra til Parísar í tengslum við Ólympíumót fatlaðra
Verkefni sendiráðsins á þessu tímabili hafa verið bæði fjölbreytt og skemmtileg og ber þar hæst að nefna heimsókn Höllu Tómasdóttur, forseta Íslands og Guðmundar Inga Guðbrandssonar, félags- og vinnumálaráðherra til Parísar í tengslum við Ólympíumót fatlaðra. Þá hefur verið einstaklega ánægjulegt að verða vitni að frábærri frammistöðu íslensku keppendanna á mótinu.
Forsetahjónin, Halla Tómasdóttir og Björn Skúlason, komu til Parísar til að vera viðstödd setningarathöfn Ólympíumóts fatlaðra og til að hvetja íslenska íþróttafólkið áfram. Þau sóttu móttöku í boði forseta Frakklands og voru heiðursgestir í móttöku á vegum Össurar sem haldin var í samstarfi við sendiráðið til heiðurs íslensku keppendunum og íþróttafólki úr Team Össur. Þess má geta að í liði Össurar eru 18 keppendur sem styðjast við stoðtæki frá Össuri og var það sannkölluð ánægja að taka á móti hluta hópsins í sendiherrabústað Íslands í París.
Þá átti forseti góðan fund með borgarstjóra Parísar, Anne Hidalgo. Forsetinn óskaði borgarstjóranum til hamingju með vel heppnaða Ólymíuleika og Ólympíumót fatlaðra en borgin öll hefur verið notuð í að hýsa leikana og undirbúningur staðið yfir í mörg ár, m.a. með tilliti til aðgengis allra að almenningssamgöngum og uppbyggingu Ólympíuþorpsins.
Forsetahjónin og félagsmálaráðherra, ásamt fulltrúum sendiráðsins, heimsóttu einnig keppendur, þjálfara og aðstandendur í Ólympíuþorpinu og fengu þar hlýjar móttökur.
Við þökkum íþróttasambandi fatlaðra fyrir afar ánægjulegt og gott samstarf og óskum íþróttafólkinu okkar til hamingju með frábæran árangur á mótinu!